ஆபீஸ் அரவிந்தசாமி

நம்ம ஆபீஸ்ல ஒரு அரவிந்தசாமி இருக்காருங்க. அவரு பேரு அரவிந்தசாமி இல்ல பாக்குரதுக்கு ஆளு அரவிந்தசாமி மாதிரி இருப்பாரு. அவர் உண்டு அவரோட வேலை உண்டுன்னு ரொம்ப அமைதியா அடக்கமா இருப்பாரு. எல்லாருக்கும் எல்லா உதவியும் மனசுகோணாம செய்வாரு. ஏன்னா அவரு உத்தியோகம் அப்புடி. வெள்ளிகிழமைல கூட புல் பார்மல்ஸ்ல வருவாரு. ஒரு சாமியாரு மாதிரி வந்துட்டு இருப்பாரு. திடீர்னு என்ன ஆச்சுனே தெரியல இப்போ ஆளே ரொம்ப மாறிட்டாரு. பயங்கரமா ஸ்டைல் பண்றாரு. எப்பவுமே ஒரே சிரிப்பா இருக்குது. ரொம்ப பிஸியா இருக்குற மாதிரி ஓவரா சீன போடுறாரு. போன வாரம் வெள்ளிகிழமை அவரு போட்ருந்த காஸ்ட்யூம பார்த்து ஆபீஸ் முழுசா ஒரு அதிரிச்சி அலையே பரவிருச்சு. ஜீன்ஸ், டி ஷர்ட் அப்புறம் லேட்டஸ்ட் ஸ்போர்ட்ஸ் சூ, கழுத்துல கைல விதவிதமான பேண்ட்ஸ் எல்லாம் போட்டு ஒரு குமால்டிக்கா வந்தாரு. என்னனு விசாருச்சப்பதான் தெருஞ்சது சும்மா இருந்த சிங்கத்த சொரிஞ்சு விட்டுட்டாய்ங்கனு. எதோ நடந்துருக்கு. அதுக்கபுறம் தான் தலைவர்கிட்ட இவ்வளவு மாற்றங்கள். டெய்லி கனவு கண்டுகிட்டே வர்றாரு போறாரு. யார்கிட்ட லாக் ஆயிருக்காருனு தெரியல?. தெருஞ்சா சொல்றேன்.

ராவணன்

ஒவ்வொருத்தருக்கும் ஒவ்வொரு பீலிங்க்ஸ். அதே மாதிரிதான் ராவணன் படத்த பாக்குரவங்களுக்கும். சாமானியனுக்கு எடுக்குற படத்த பண்டிதர்கள் அப்டின்னு தங்களைத் தாங்களே சொல்லிக்கிற சில சின்ன பசங்க ராவணன் படம் நல்லா இல்ல, வசனமே புரியல, திரைக்கதை சரி இல்ல அப்புறம் ஏ.ஆர். ரஹ்மான் இசை சரி இல்ல அப்டின்னு சொல்லிக்கிட்டு திரிறாய்ங்க. அதாவது எல்லாரையும் சகட்டு மேனிக்கு திட்டனும் விமர்சனம் பண்ணனும் அப்புறம் குற்றம் சொல்லணும் அதுல பிரபலமாகனும், இத மட்டுமே தன்னோட வாழ்கையின் குறிக்கோளாய், லட்சியமாய் கொண்ட சாருநிவேதிதா ராவணன் படத்த ரொம்ப கொதறி இருக்காரு. இதெல்லாம் ஒரு பொழப்பா அப்டின்னு கேக்குரவங்ககிட்ட அது தான் அவரோட பொழப்பு அப்டின்னு தாழ்மையுடன் சொல்லிக்குறேன். வீரையா அப்டினா அது வீரப்பனாம், அவர இந்த படத்துல மணி நல்லவரா காமிச்சுட்டாரம். சாருவோட மகத்தான கண்டுபிடிப்பு இது. முடியல!!!!. இவர பெர்முடா முக்கோணம் அனுப்பனும். இவர பத்தி வினவுல ஒன்னு சொல்லிருந்தாங்க, அத படுச்சு சிரிச்சு சிரிச்சு வயறு வலி வந்துடுச்சு. ஒருத்தன் ஒரு பீர் வாங்கி குடுத்தா ஒடனே அவன தன்னோட சீடனா ஏத்துகிட்டு அவனோட புகழ் பாடுவாராம். ஜெயமோகன் ஆபீஸ்ல தூங்குறத பத்தி ப்ளாக்ல எழுதுறாருன்னு குத்தம் சொல்ற இவரு நாய் மேய்க்கிறத என்னவோ நாட்டைக் காப்பாத்துற மாதிரி சொல்றாரு அவரோட ப்ளாக்ல.

மக்களுக்கு இசை பிடுச்சுருக்கு, விக்ரம் & ஐஸ்வர்யா நடிப்பு பிடுச்சுருக்கு. படத்த எடுத்த விதம் பிடுச்சுருக்கு. ஒரு ரெண்டு மணிநேரம் தங்களை மறந்து சில விஷயங்கள ரசிக்கத்தான் மக்கள் படத்துக்கு போறாங்க. அவங்கள இந்த படம் கட்டாயம் ஏமாத்தாது. வீரையாவாவே விக்ரம் வாழ்துருக்காரு. அவருக்கும் ஐஸ்வர்யாக்கும் இடைல வரும் அந்த மெல்லிய உறவை எவ்ளோ கண்ணியமா காமிக்கணுமோ அவ்ளோ கண்ணியமா மணி காமிச்சிருக்காரு. படத்தோட ஹீரோக்கள் ஏ.ஆர். ரஹ்மான் மற்றும் ஒளிப்பதிவாளர். ஏ.ஆர். ரஹ்மான் பேர போட்டதும் தியேட்டர்ல அப்டி ஒரு விசில் சத்தம். எப்பவும் மணி படத்துல எல்லாரையும் தாண்டி மணி ஹீரோவா தெரிவார். ஆனா இந்த படத்துல அவரையும் தாண்டி இவங்க தெரிறாங்க. ஆர்ட் டைரக்டர் அவரோட பணிய ரொம்ப சிறப்பா செஞ்சுருக்காரு. தன் தங்கச்சிய சிதச்சவங்கள கொன்னுட்டு அதுக்கு காரணமானவன அசிங்கப் படுத்துறாரு. தன் தங்கச்சிய நல்லா பாத்துக்குவான்னு நம்பி கல்யாணம் செஞ்சு குடுத்த மாப்பிளை அவளை கை விட்டுட்டு பயந்து ஓடினதும் அவனோட கைய வெட்டுறாரு வீரையா. இதெல்லாம் நடக்காத காரியம், இப்டியா பண்ணுவாங்கனு சொல்ற சின்ன பய மக்களுக்கு ஒன்னு சொல்லிக்கிறேன். உங்கள யாரும் படம் பாக்க பாக்கு வெத்தல வெச்சு அழைக்கல. படத்துல எல்லாமே கரெக்டா இருக்கானு கேட்டா இல்லன்னு தான் சொல்லணும். நூறு சதம் இல்லனாலும் எண்பது சதம் சிறப்பாவே இருக்கு. இது விமர்சனம் இல்ல மக்களே என்னோட கருத்து. படம் பாக்குறதும் பாக்காததும் உங்க இஷ்டம். படம் பாக்குறதா இருந்தா தியேட்டர்ல பாருங்க குட் விசுவல் ட்ரீட்.

சித்திரைத் திருவிழா

மதுரையில் நடைபெறும் முக்கியமான விழா சித்திரைத் திருவிழா. கோடைகாலமான ஏப்ரல்-மே மாதத்தில் நடக்கும் சித்திரைத் திருவிழா மிகவும் பிரசித்தி பெற்றது. இந்தத் திருவிழாவிற்கு தென்னிந்தியாவின் பல்வேறு மூலைகளிலிருந்தும் பக்தர்களும், யாத்ரீகர்களும் வருவது வழக்கம். இந்த மாதத்தில்தான் மீனாட்சிக்கு சுந்தரேசுவரருடன் திருமணம் முடிக்கும் விழா நடைபெறுகிறது. அதைத் தொடர்ந்து அழகர் ஆற்றில் இறங்கும் வைபவம் நடைபெறும். இந்த திருவிழாவிற்கு மட்டுமே மதுரைக்கு சுமார் பத்து லட்சம் மக்கள் வெளியூரிலிருந்து வருவார்கள். "கோவிந்தா" என்று லட்சக்கணக்கான மக்கள் முழங்க அழகர் ஆற்றில் இறங்குவார். மதுரையில் நடந்த வைணவ மற்றும் சைவ மதத்தினருக்கு இடையேயான சண்டையை தவிர்க்க திருமலை நாயக்கரால் முதல் முதலாக இரு மதத்தினருக்கும் பொதுவான திருவிழாவாக சித்திரைத் திருவிழா நடத்தப்பட்டு இன்றும் தொடர்ந்து நடந்து வருகிறது.

அழகர் மீனாட்சியின் சகோதரர் ஆவார். அவர் மீனாட்சியின் திருமணத்தை நடத்திவைக்க அழகர் கோயிலில் இருந்து புறப்பட்டு மதுரைக்கு வருகிறார். ஆனால் தான் வருவதற்கு முன்பே திருமணம் முடிந்ததை கேள்விப்படுகிறார். ஆற்றில் கூட கால் படாமல் திரும்பி வருகிறார். மீனாட்சி அம்மன் திருகல்யாணம், எதிர் சேவை, மீனாட்சி அம்மன் பட்டாபிஷேகம், தேரோட்டம் மற்றும் அழகர் ஆற்றில் இறங்குவது என்று நீண்ட நாட்களாக நடைபெறும். இந்த விழாவின் உச்சகட்டம் அழகர் ஆற்றில் இறங்குவது. மீனாட்சி அம்மன் திருக்கல்யாணம் நடைபெறும் நாளில் சுமங்கலிகள் புதிய தாலிக்கயிறு அணிவார்கள். வேண்டுதலுக்காக அன்று சில பக்தர்கள் கோவிலுக்கு வரும் அனைவருக்கும் புதிய தாலிக்கயிறு வழங்குவார்கள். எதிர் சேவையின் போது அழகர் அணிய ஆண்டாள்(சூடித்தந்த சுடர்க்கொடி) திருக்கோவிலில் இருந்து மாலை வரும்.

அழகர் தங்க குதிரையில் மதுரைக்கு தன் தங்கை கல்யாணத்திற்காக பவனி வருவார். அழகர் கோவிலில் இருந்து கள்ளழகர் பல்லகில் மதுரை வரை வருவார். வரும் வழயில் இருக்கும் 18 மண்டபங்களில் ஓய்வெடுத்து நிதானமாக வலம் வருவார். யானை வரும் பின்னே மணியோசை வரும் முன்னே என்பது போல அழகர் வருவதற்கு முன்னால் அவரது உண்டியல்கள் வரும். அழகர் என்ன பட்டு உடுத்தி ஆற்றில் இறங்குவார் என்ற எதிர்பார்ப்பு அனைவரிடமும் நிலவும். பச்சை பட்டு உடுத்தி இறங்கினால் அந்த ஆண்டு தமிழகத்தில் நல்ல மழை பெய்து பசுமையான ஆண்டாக இருக்கும் என நம்பப்படுகிறது. அழகர் வரும்பொழுது அவர் ஆற்றில் இறங்குவதற்க்காக வைகை அணையிலிருந்து தண்ணீர் திறந்து விடப்படும். கடந்த சில வருடங்களாக பச்சை பட்டு உடுத்தி இறங்கியும் வைகை அணையில் தண்ணீர் இல்லாததால் அழகர் வாய்காலில் இறங்குகிறார் என்பது வேறு விஷயம்.

அழகர் திருவிழா நடைபெறுவது கோடைகாலத்தில். அதனால் அழகர் வரும் பாதை முழுவதும் நீர், பானகம் மற்றும் மோர் பந்தல்கள் பக்தர்களினால் அமைக்கப்பட்டிருக்கும் அழகரைக் காண வரும் பக்தர்களின் தாகத்தை தீர்க்க. சற்று வசதியானவர்கள் ரஸ்ணா கூட வழங்குவார்கள். இந்த வருட விழாவில் தாகம் கொண்ட யானை ஒன்று ஒரு பந்தலுக்குள் சென்று ஒரு ரஸ்ணா அண்டாவையே காலிசெய்தது. பலியிடல், மொட்டை போடுதல்,நேர்த்திக் கடன் செலுத்துதல் போன்றவை அழகர் கோயிலிலும் மேற்கொள்ளப் படுகின்றன. கள்ளழகர் வேடமிட்ட பக்தர்கள் வெயிலின் உக்கிரத்தை குறைக்க மக்களின்மேல் நீரை பீய்ச்சி அடிப்பார்கள். விசிறிகள் அனைவருக்கும் இலவசமாக வழங்கப்படும். அன்னதானம் நடைபெறும். அழகர் திருவிழா நடைபெறும் பொழுது மட்டுமே மதுரையில் சீரணி விற்கப்படும். அதிலும் கருப்பட்டி சீரணி அமிர்தமாக இருக்கும். சித்திரைத் திருவிழாவை முன்னிட்டு மதுரையில் தமுக்கம் மைதானத்தில் சித்திரைப் பொருட்காட்சி நடைபெறும். கோடைகாலத்தில் மதுரைச் சிறுவர்களின் ஒரே பொழுதுபோக்கு சித்திரைப் பொருட்காட்சி.

அழகர் வரும்பொழுது மக்கள் தங்கள் கைகளின் வெல்லம் மற்றும் பொரிகடலை கலந்த பிரசாதத்தை ஒரு சொம்பில் வைத்து வாழை இலையால் மூடி, அதன் மேல கற்பூரத்தைக் கொளுத்தி, தாங்களாகவே அழகரை நோக்கி ஆரத்தி எடுத்துக்கொள்வார்கள்."சாமி இன்னிக்கு எங்க இருக்குது" என்பதே சித்திரைத் திருவிழாவில் முக்கியமான கேள்வியாக மக்களிடையே இருக்கும்.

மதுரையை சுற்றி உள்ள கிராம மக்கள் அனைவரும் மாட்டு வண்டி கட்டிக் கொண்டு மதுரைக்கு திருவிழா காண வருவார்கள். சிறு வயதில் என்னை மிகவும் ஆச்சரியப்படுத்திய வண்டி அது. அதில் எல்லா வசதிகளும் இறக்கும். மாடு மட்டும் சுமார் எட்டு அடி உயரம் இருக்கும். சமையல் செய்ய பாத்திரம், அடுப்பு மற்றும் தூங்கும் வசதி எல்லாமே அதில் இருக்கும். மதுரையில் பொங்கல் அல்லது சித்திரைத் திருவிழாவிற்கு மட்டுமே வீட்டுக்கு வெள்ளை அடிப்பார்கள். ஊரே புத்தம் புதிதாக மாறி இறக்கும். சாதி, மதம் அனைத்தையும் கடந்து மதுரை மக்கள் அனைவராலும் கொண்டாடப்படும் ஒரு விழா சித்திரைத் திருவிழா.

மதுரை - அழகர் கோவில்

மதுரையின் மற்றொரு முக்கியத்துவம் வாய்ந்த கோவில் அழகர் கோவில். மதுரையிலிருந்து 21 கி.மீ. தூரத்தில் இருகின்றது அழகர் மலை. கிழக்கு மேற்காக 18 கி.மீ. நீளமும் 320 மீட்டர் உயரமும் உள்ள இம்மலை "திருமாலிருஞ்சோலை , உத்யானசைலம், சோலைமலை, மாலிருங்குன்றம், இருங்குன்றம், வனகிரி" முதலிய பெயர்களால் அழைக்கப்படுகிறது. இரண்டு அழகர் தலங்களை அழகர் மலை கொண்டுள்ளது. ஒரு அழகன் அடிவாரத்தில் இருக்கும் பெருமாள் அழகர்(கள்ளழகர்). மற்றொருவர் மலைமீது குடிகொண்டுள்ள தமிழ் அழகன் முருகன். ஆம் முருகனின் அறுபடை வீடுகளில் ஒன்றான பழமுதிர்ச்சோலை(சுட்ட பழம்) அழகர் மலையில் உள்ளது.அழகர் கோவில் மற்றும் மலையை சுற்றி இருந்த ஊர் அழகாபுரி என்ற பெயரைக்கொண்டு இருந்தது.அழகர் கோவில் அழகாபுரி கோட்டையின் உள்ளே அமைந்துள்ளது. கோட்டையின் மிஞ்சிய பாகங்களை இன்றும் கோவிலைச்சுற்றிக் காணலாம். இங்கே மூலவராக இருக்கும் பெருமாளின் மற்றொரு பெயர் பரமஸ்வாமி என்னும் சிவனின் பெயர். மத ஒற்றுமைக்காக இவ்வாறு அழைக்கப்படுவதாகக் கூறப்படுகிறது. பிரசாதமாக அழகர் கோவில் புகழ் தோசை தருகிறார்கள். இங்கே இருக்கும் விநாயகரின் பெயர் தும்பிக்கை ஆழ்வார். இங்கே ஆண்டாளின் சன்னதிகூட உண்டு. ஆண்டாள் இங்கே பெரியாழ்வாருடன் வந்ததாக வரலாறு உண்டு. கள்ளழகர் கோவில் 108 திவ்ய தேசங்களில் ஒன்று. வைணவத் திருத் தலங்களிலேயே ராஜகோபுரத்தில் தங்கக் கலசம் கொண்ட ஒரே கோவில். கோபுரம் முழுவதும் அழகான சிற்பங்களைக் கொண்டுள்ளது.




மலை மீது சென்றால் பழமுதிர்சோலையையும் முருகன் சந்நிதானத்தையும் காணலாம். மிக அழகான அமைதியான ஒரு இடமாகும். பழமுதிர்சோலையை அடுத்து ஒரு மூலிகை வனம் உண்டு. அரசாங்கத்தால் நடத்தப்படும் இந்த வனத்தில் பல அரிய மூலிகைகளை பராமரித்து வருகிறார்கள். இங்கே மரக்கன்றுகளை வாங்கலாம். இன்னும் சிறிது தூரம் சென்றால் அழகர் தீர்த்தம் என்றழைக்கப்படும் நூபுர கங்கை இருக்கிறது. என்றும் வற்றாத இந்த நீரானது கங்கை நீரை விட புனிதமானதாகக் கருதப்படுகிறது. மலைகளின் வழியாக வருவதால் பல்வேறு மூலிகை கடந்து வருவதாகக் கூறப்படுகிறது. இதனால் மருத்துவத்தன்மை உடையது என்று நம்பப்படுகிறது. பக்தர்கள் அனைவரும் இதில் குளிப்பதற்காக பல வசதிகள் செய்யப்பட்டுள்ளன. இங்கே ராக்காயி அம்மன் கோவில் உள்ளது. அடிவாரத்தில் இருந்து இங்கே செல்வதற்கு வாகன வசதி கோவில் நிர்வாகத்தால் அளிக்கப்படுகிறது.


அழகர் மலையில் கடவுள்களை காண்கிறோமோ இல்லையோ, நமது முன்னோர்கள் நிறையபேரைக் காணலாம். மலை முழுதும் குரங்குகள் தான். கையிலே உணவுப்பொருட்களை எடுத்துச்செல்ல முடியாது. உரிமையுடன் பிடுங்கிக்கொள்வார்கள். மூலிகை வனத்திற்கு பக்கத்தில் ஒரே மரத்தில் பல ஆயிரக்கணக்கான வவ்வால்களைக் காணலாம். பச்சை பசேலென்று இருக்கும் அழகர் கோவில் மதுரை இளைஞர்களின்(காதலர்களின்) முக்கிய சுற்றுலாத்தளமாக உள்ளது. அழகர் திருவிழா(சித்திரைத் திருவிழா) பற்றி அடுத்த பதிவில் பார்க்கலாம்.

மதுரை - மீனாட்சி அம்மன் கோவில் வரலாறு

மதுரை என்றாலே பலருக்கும் உடனடியாக நினைவுக்கு வருவது மீனாட்சி அம்மன் கோவிலாகும். சிவபெருமான் மற்றும் அம்மன் இருவருக்குமான கோவில்களில் முதன்மைச் சிறப்பு பெற்றது மீனாட்சி சுந்தரேசுவரர் கோவில். மதுரையில் மீனாட்சி பிறந்ததாகக் கருதப்படுவதால், மீனாட்சி சன்னிதானம் முதன்மையாக உள்ளது. அம்மனை வணங்கிய பின்பே சிவபெருமானை வணங்கும் மரபு கடைபிடிக்கப்படுகிறது. இந்த ஆலயம் மீனாட்சி , சுந்தரேஸ்வரரை முதன்மை விகிரகங்களாகவும் கடம்ப மரத்தினை தலவிருட்ஷமாகவும் கொண்டுள்ளது. பாண்டிய மன்னன் குலசேகர பாண்டியனின் கனவில் சிவபெருமான் வந்ததால் அவன் கடம்பவனம் என்ற காட்டை அழித்து மதுரை மாநகரையும் இந்த சிவசக்தி தலத்தையும் அமைத்ததாகக் கருதப்படுகிறது. மீனாட்சி அம்மன் கோவிலைச்சுற்றி நான்கு மாடங்கள் அமைத்துள்ளதால் நான்மாடக்கூடல் என்ற பெயரும் மதுரைக்கு உண்டு. சிவபெருமானின் அணிகலன்களில் ஒன்றான பாம்பு வட்டமாக தன் வாலை வாயினால் கவ்விக் கொண்டு இத்தலத்தின் எல்லையைக் காட்டியதால் ஆலவாய் என்ற பெயர் இத்தலத்திற்கு ஏற்பட்டது என்று ஒரு வரலாறு கூறுகிறது.



மதுரை மீனாட்சி சுந்தரேஷ்வரர் கோயில் 15 ஏக்கர் பரப்பளவில் அமைந்துள்ளது. இக்கோயில் எட்டு கோபுரங்களையும் இரண்டு விமானங்களையும் உடையது. இங்குள்ள கருவறை விமானங்கள், இந்திர விமானம் என்று அழைக்கப்படுகிறது. 32 சிங்கங்களும், 64 சிவகணங்களும், 8 வெள்ளை யானைகளும் இந்த கருவறை விமானங்களைத் தாங்குகின்றன.

மீனாட்சி அம்மன் திருக்கோவில் சுமார் ௮௦௦ ஆண்டுகள் பழமை வாய்ந்தது. இத்திருக்கோயில் கிழக்கு மேற்காக 847 அடியும், தெற்கு வடக்காக 792 அடியும் உடையது. இக்கோவிலின் ஆடி வீதிகளில் நான்கு புறமும் ஒன்பது நிலைகளை உடைய நான்கு கோபுரங்கள் மிக உயர்ந்த நிலையில் இருக்கிறது. கிழக்குக் கோபுரம் கி.பி. 1216 முதல் 1238 ஆண்டுக்குள்ளும், மேற்குக் கோபுரம் கி.பி. 1323 ஆம் ஆண்டிலும், தெற்கு கோபுரம் கி.பி. 1559 ஆம் ஆண்டிலும், வடக்குக் கோபுரம் கி.பி. 1564 முதல் 1572 ஆம் ஆண்டிலும் கட்டப்பெற்று முடிக்கப் பெறாமல், பின்னர் 1878 ஆம் ஆண்டில் தேவகோட்டை நகரத்தார் சமுதாயத்தைச் சேர்ந்த வயிநாகரம் குடும்பத்தினரால் முடிக்கப்பட்டதாகவும் வரலாறு கூறுகிறது. இவற்றுள் தெற்குக் கோபுரம் மிக உயரமானதாகும். இதன் உயரம் 160 அடி ஆக இருக்கிறது. மீனாட்சி அம்மன் கோபுரம் காளத்தி முதலியாரால் கி.பி. 1570ல் கட்டப் பெற்று 1963 ஆம் ஆண்டில் சிவகங்கை அரசர் சண்முகத்தால் திருப்பணி செய்யப் பெற்றது. சுவாமி கோபுரம் கி.பி. 1570 ஆம் ஆண்டில் கட்டப் பெற்று திருமலைகுமரர் அறநிலையத்தால் திருப்பணி செய்யப் பெற்றது. இக்கோயிலுனுள் ஒரு ஏக்கர் பரப்பளவில் பொற்றாமரைக்குளம் அமைக்கப்பட்டுள்ளது.



இக்கோயிலினுள் அஷ்டசக்தி மண்டபம், மீனாட்சி நாயககர் மண்டபம், முதலி மண்டபம், ஊஞ்சல் மண்டபம், கம்பத்தடி மண்டபம், கிளிக் கூட்டு மண்டபம், மங்கையர்க்கரசி மண்டபம், சேர்வைக்காரர் மண்டபம் போன்ற கலையழகு மிக்க மண்டபங்கள் இருக்கின்றன. கிருஷ்ணப்ப நாயக்கர் காலத்தில் அவருடைய அமைச்சர் அரியநாத முதலியாரால் இங்கு அமைக்கப்பட்ட ஆயிரங்கால் மண்டபம் மிகச் சிறப்பு பெற்ற ஒன்றாகும். இம்மண்டபத்தில் 985 தூண்கள் சிறப்பாக அமைக்கப்பட்டுள்ளது. இது தவிர கோயிலின் கிழக்குக் கோபுரத்திற்கு எதிரே 124 சிற்பத்தூண்கள் அடங்கிய புது மண்டபம் ஒன்றும் உள்ளது. (இந்த புது மண்டபம் முழுவதும் சிறு வணிகக்கடைகளாக அமைக்கப்பட்டு உள்ளது.)



மதுரை மீனாட்சியம்மன் கோயிலை தாமரை மொட்டைப் போல் வைத்துக் கொண்டால் அதைச் சுற்றியுள்ள தெருக்களை தாமரை இதழ்களாகக் கூறலாம். மீனாட்சியம்மன் கோயிலுக்குள் இருக்கும் வீதிகளுக்கு ஆடி வீதி என்று பெயர். அதைத் தாண்டி கோயிலுக்கு வெளியில் சித்திரை வீதிகள், சித்திரை வீதீகளுக்கு அடுத்த வீதிகள் ஆவணி வீதிகள், அதைத் தாண்டி வெளியே வந்தால் மாசி வீதிகள். அதையும் தாண்டி வெளி வீதிகள் என மதுரை நகர் அமைக்கப்பட்டுள்ளது.இந்தத் தெருக்களுக்கு தமிழ் மாதங்களின் பெயர் வைக்கப்பட்டிருப்பதற்கும் ஒரு காரணம் உள்ளது. மன்னர்கள் காலத்தில் குறிப்பிட்ட மாதங்களில் நடைபெறும் விழாக்கள் அந்த மாதங்களின் பெயரிலான தெருக்களில்தான் நடைபெறும். 'மீனாட்சி சுந்தரேஸ்வரர்' ஆலயத்தில் மீனாட்சி , சுந்தரேஸ்வரர் விகிரக வடிவிலும் பூரிக்கப்படுகின்றன.

• மதுரை மீனாட்சியில் அமைந்துள்ள முதன்மை விக்கிரகம் முழுவதுமாக தூய மரகத மாணிக்கத்தினால் உருவாக்கப்பட்டதாகும். மரகத்தின் இயற்கை வர்ணமான பச்சை நிறத்தில் காட்சி தரும் மூல விக்கிரகத்தினை "மரகதவல்லி" எனவும் அழைக்கின்றனர்.
• மதுரை மீனாட்சி கோவில் 45 ஏக்கர் (180,000 சதுர மீட்டர்கள்) நிலத்தில் அமைக்கப்பட்டுள்ளது.ஆலயத்தின் மொத்த தள அமைப்பு 254 மீட்டர் நீளமும் 237 மீட்டர் அகலமும் கொண்டுள்ளது.
• இந்த ஆலயம் 8 கோபுரங்களை தன்னகத்தே கொண்டுள்ளது. 8 கோபுரங்களும், நான்கு முனை சதுர வடிவில் அமைக்கப்பட்டுள்ளது. இங்குள்ள இரட்டை கோபுரத்தில் ஒன்று மீனாட்சிக்கும், மற்றொன்று சுந்தரேஸ்வரர்க்கும் அர்பணிக்கப்பட்டுள்ளது.
• ஒன்பது தட்டுக்களை (அடுக்கு) கொண்ட கோபுரங்களுள் பிரசித்தமானதும் மிக உயரமானதுமாக தெற்கு வாசல் 170 அடி (52 மீற்றர்) உயரமுடையது.மற்றய வடக்கு, மேற்கு, கிழக்கு கோபுரங்கள் முறையே 160, 163, 161 அடி உயரம் என்பதும் குறிப்பிடதக்கது.
• மீனாட்சி ஆலயம் பல உள்ளக மண்டபங்களையும் கொண்டுள்ளது. இவற்றுள் ஆயிரம் கால் (1000 தூண்கள்) மண்டபம் மிகவும் பிரசித்தி பெற்றது.
• 600 வருடங்களின் மேலான கட்டுமானத்தில் உருவாகியதும் , மிகவும் கலை அம்சம் மிக்கதுமான இந்த ஆலயத்தில் மொத்தமாக 33 மில்லியன் கலை வேலைப்பாடுகள் இருப்பதாக சொல்லப்படுகின்றது.
• ஆலய உட்பகுதியில் ஒரு ஏக்கர் விஸ்தீரனத்தில் அமைந்துள்ள பொற்தாமரை குளமும் , தலவிருட்ஷமான கடம்ப மரமும் ஆலயத்தின் வரலாற்றில் மேலும் சிறப்பு சேர்க்கின்றன.
• பலநூற்றாண்டு பழமையான கட்டிடவேலைப்பாடுகளை கொண்டுள்ள இந்த ஆலயம் நவீன பல் வர்ண பூர்ச்சுக்களால் தற்காலத்தில் அலங்கரிக்கப் பட்டுள்ளது.
• வரலாற்று தொன்மையும் பிரமிக்கவைக்கும் கலை நுணுக்கமும் ஒன்றுசேர உள்ள இந்த ஆலயமனது உலக அதிசையங்களின் வரிசையில் போட்டி போட்டது நினைவிருக்கலாம்.

ஒரு நகரம் எவ்வாறு உருவாக்கப்பட வேண்டும், அதன் கட்டமைப்புகள் எவ்வாறு இருக்க வேண்டும், அதன் வீதி அமைப்புகள் எவ்வாறு உருவாகப்பட வேண்டும் என்பதை மதுரையைப் பார்த்து தெரிந்து கொள்ளலாம் என்று கர்ம வீரர் காமராஜர் கூறி உள்ளார். அது மீனாட்சி அம்மன் கோவிலையும் அதைச்சுற்றி உள்ள வீதிகளையும் கருத்தில் கொண்டே.

கோவிலைச் சுற்றி பார்க்க : http://view360.in/virtualtour/madurai/

மதுரை

மதுரை நான் பிறந்து வளர்ந்த ஊர். சென்னையில் யாரவது உங்கள் சொந்த ஊர் என்ன என்று கேட்கும்போது மதுரை என்று சொல்லும்போதே பெருமையாக இருக்கும். இப்படிப்பட்ட மதுரையின் சிறப்புகள் பல. நான் பேசும் தமிழை வைத்தே நான் மதுரைக்காரன் என்று மற்றவர்கள் கண்டுகொள்கின்றனர். சென்னை வந்ததும் எனது உச்சரிப்புகள் சற்று மாறி உள்ளன. எனது மதுரைத்தமிழ் நிறைய பேருக்கு புரியாததே அதற்கு காரணம். சங்கம் வைத்து தமிழ் வளர்த்த ஊர் எங்கள் மதுரை. கூடல் நகர், மல்லிகை மாநகர், தூங்கா நகரம், மதுரையம்பதி, கிழக்கின் ஏதென்ஸ் மற்றும் கோவில் நகரம் என்று பல சிறப்பு பெயர்கள் கொண்டது எங்கள் மதுரை. நீண்ட நெடிய வரலாறு கொண்டது.நகரத்தின் நடுவிலும் எல்லைகளிலும் கோவில்களைக் கொண்ட ஒரே நகரம் எங்கள் மதுரை. அந்த மதுரையின் சிறப்புகளை பதிவு செய்ய வேண்டும் என்று நீண்ட கால ஆசையை இப்போது தீர்த்துக்கொள்கிறேன்.

மதுரையின் வரலாறு

தமிழ்நாட்டின் தலை சிறந்த நகரங்களில் ஒன்று மதுரை. தமிழ் நாட்டின் பழமையான நகரங்களில் ஒன்று. சுமார் 2500 ஆண்டுகள் வரலாறு உடையது. மூவேந்தர்களில் ஒருவராம் பாண்டிய மன்னர்களின் தலை நகரம். வைகை ஆற்றங்கரையில் அமைந்த நகரம். நான்கு சங்கங்கள் வைத்து தாய் மொழியாம் தமிழ் மொழியை வளர்த்த நகரம். பாண்டியர்கள், சுல்தான்கள், நாயக்கர்கள் மற்றும் ஆங்கிலேயர்கள் ஆகியோரால் ஆளப்பெற்றது. இந்து கடவுள் மீனாட்சி பிறந்த இடமாக மதுரை கருதப்படுகிறது. ஆகவேதான் உலகப்புகழ் பெற்ற இந்து சமயத்தின் முக்கிய தளமான மீனாட்சி அம்மன் கோவிலை தன்னகத்தே கொண்டுள்ளது. இக்கோயிலில் நடக்கும் திருவிழாக்கள் சமுதாய ஒருங்கிணைப்பிற்கு ஒரு எடுத்துக்காட்டாக மட்டுமன்றி, அன்றைய மன்னராட்சியின் ஆட்சிச் சிறப்பையும் எடுத்துரைக்கும் வண்ணம் கொண்டாடப்படுகின்றன. மதுரை தமிழின் ஐம்ப்ருங்காப்பியங்களின் ஒன்றான சிலப்பதிகாரம் கதையின்படி அதன் நாயகி கண்ணகியால் ஒரு முறை எரிக்கப்பட்டதாக கூறப்படுகிறது.

வரலாற்றுப் பக்கங்களைப் புரட்டிப்பார்க்கும்போது மதுரை பல்வேறு அரசாட்சியின் கீழ் இருந்தாலும், பாண்டியர்கள் மற்றும் நாயக்கர்கள் காலம் தான் மதுரைக்குப் பொற்காலமாக இருந்திருக்கிறது. கிபி 1 முதல் 5ஆம் நூற்றாண்டு வரையில் சங்ககாலப் பாண்டியர்கள் வசமும், 5 முதல் 13ஆம் நூற்றாண்டு வரையில் இடைக்காலப் பாண்டியர்கள் வசமும் இருந்த மதுரை 14 முதல் 16 ஆம் நூற்றாண்டின் தொடக்கம் வரை டெல்லி சுல்தான்களின் வசம் இருந்தது. விஜயநகரப் பேரரசு மூலம் அந்த சுல்தான்களின் பொற்காலஆட்சி முறியடிக்கப்பட்டு 1520ல் விஜயநகரர்களின் நேரடிக் கண்காணிப்பில் இயங்கும் நாயக்கர்கள் ஆட்சியில் அமர்ந்தனர். அவர்கள் ஆட்சியாண்டில் 1623முதல் 1659வரையிலான மன்னர் திருமலையின் ஆட்சி மீனாட்சியம்மன் கோயிலுக்கும் மதுரைக்கும் ஒரு பொற்காலமாக இருந்திருக்கிறது. 1736ல் நாயக்கர்கள் வீழ்ச்சியுற, 1801ல் ஆங்கிலேயரிடம் சென்றது. ஆங்கிலேயர்கள் இவ்விடத்தின் கலைப் பொருட்களை வளர்க்காவிட்டாலும், அழிக்கவில்லை.தற்போதைய மதுரையின் மையப்பகுதி பெரும்பாலும் நாயக்கர்களால் கட்டப்பட்டதாகும். கோயில், மன்னர் அரண்மனை நடுவிலிருக்க, அதனைச் சுற்றி வீதிகளையும் குடியிருப்புகளையும் அமைக்கும், இந்து நகர அமைப்பான "சதுர மண்டல முறை" மதுரையில் பின்பற்றப்பட்டுள்ளது.

மதுரை மாநகரில் மீனாட்சி-சுந்தரேசுவரர் கோயில், திருமலை நாயக்கர் அரண்மனை, வண்டியூர் மாரியம்மன் கோயில் தெப்பக்குளம், காந்தி அருங்காட்சியகம் என்று சுற்றுலாப் பயணிகளைக் கவரும் அம்சங்கள் இந்நகரில் நிறைய இருக்கிறது. தூங்கா நகரமான மதுரைக்கு அருகில் அழகர்கோயில், பழமுதிர்சோலை, திருப்பரங்குன்றம் போன்ற இந்துமதத்தின் சிறப்புமிக்க சில தலங்கள் அமைந்துள்ள ஊர்கள் உள்ளன.

இது தவிர எக்கோ பார்க், ஜிகர்தாண்டா, வைகை நதி, சித்திரை திருவிழா மற்றும் மல்லி என பல சிறப்புகள் மதுரைக்கு மட்டுமே சொந்தம். இனிவரும் பதிவுகளில் மதுரையின் சிறப்புகள் ஒவொன்றாக பார்க்கலாம்.

விக்காத கடை

நம்ம யூத்து மழை பேஞ்ச அன்னிக்கு ரொம்ப ஸ்டைலா வந்தாரு. கும்முன்னு ஒரு சூ, கண்ணுல குளிர்கண்ணாடி, புதுசா கலரா ஒரு Tshirt , வலது கைல ஒரு குடை, இடது கைல ஒரு வாட்ச்னு ரொம்ப மணமணக்க வந்தாரு. என்ன தம்பி என்ன பண்ணிட்டு இருக்கனு கேட்டாரு. ஒன்னும் பண்ணல தல எப்பவும் போல வெட்டியா தான் இருக்கேன். என்னங்க சூ புதுசா? அப்டின்னு கேட்டேன். ஆமாம்பா USல வாங்கினது. குடை? அது சிங்கப்பூர். வாட்சு? அது துபாய். Tshirt? அது மலேசியா. அப்போ perfume? UKல வாங்குனேன்பா. அப்போ இந்தியால எதுவுமே வாங்கலையா? இந்தியாவுல எதுவுமே நல்லா இல்லப்பா அதுனால எப்பவுமே எல்லாமே பாரின்லதான் வாங்குவேன். இந்தியாவுல விக்கிற எதையும் வாங்க மாட்டேன்.

நாராயணா இந்த கொசுத் தொல்ல தாங்க முடியலன்னு யோசிச்சுட்டு இருக்கும்போது அவரே மாட்டுனாரு. தம்பி இந்த சட்டை நல்லா இருக்கே எங்க வாங்குன? கடைல தான். அது இல்லப்பா எந்தக் கடைல வாங்குன? துணிக்கடைல தான். ஐயோ எந்த இடத்துல வாங்குன? துணியெல்லாம் இருக்கும்ல, துணிகூட விப்பாங்கள்ள அந்த இடத்துலதான். சரி உன்வழிக்கே வர்றேன், எந்த ஊருல வாங்குன? எங்க ஊர்ல வாங்குனேன். ஏன்டா படுத்துற? இல்லைங்க துணி வாங்குனா உடுத்துரேன், படுத்துறது இல்ல. சரி உங்க ஊரு பேரு என்ன? மதுரை. மதுரைல எந்தக் கடைல வாங்குன? மதுரைல துணிக்கடைல வாங்குனேன்.

சரி அத விடுப்பா, எனக்கு ஒரு பேண்ட் வாங்கணும், எங்க வாங்கலாம்? நான் சொன்னேன் "நேரா போங்க, லெப்ட்ல திரும்புங்க, அங்க மூணாவதா ஒரு டெய்லர் கடை இருக்கும் அங்க போய் பேண்ட் கேளுங்க". ஏய் டெய்லர் கடைல பேண்ட் விக்க மாட்டாங்கப்பா நீ அங்க போய் வாங்க சொல்ற?. நீங்க தான இந்தியாவுல விக்கிற எதையுமே வாங்க மாட்டீங்கல, அதான் விக்காத கடையா சொன்னேன். யூத்து எஸ்கேப்பு.

முக்கியமான விசயம்

இன்று நண்பர் சேரல் பிறந்தநாள் - இனிய பிறந்தநாள் வாழ்த்துக்கள் தல.

கெளம்பிட்டாய்ங்கய்யா 20/05/2010

மஜா மாமா

நாட்டாமை தோனி சமுக்காளத்துல உட்கார்ந்து இருக்காரு. பக்கத்துல ரைனா சொம்பு வெச்சுக்கிட்டு நிக்கிறாரு. "யாருடா பிராது கொடுத்தது" அப்டின்னு நாட்டாமை கேட்க, ஒடனே ரைனா "அது நெறய பேரு குடுத்துருக்காங்க ஐயா"னு சொல்றாரு. சரி சரி ஒவ்வொருத்தரா வரச்சொல்லு. கோட்டு சூட்டு போட்டுக்கிட்டு ஒருத்தரு வர்றாரு. "என்னலே உன் பிராது?" தோனி. "ஐயா இந்தியா ஏன் 20 /20 உலக கோப்பைல தோத்துச்சுங்க?". "யாருலே நீ?" . "ஐயா நான் தானுங்க சஹாரா நிர்வாகி". ஒடனே நாட்டாமை சொல்றாரு "செல்லாது செல்லாது. நீ டீம்க்கு ஸ்பான்சர் பண்ணா, ஒடனே பிராது குடுத்துடுவியா? அதான் எல்லா பயலுகளும் சட்டைல உன் லோகோவ போட்டு ஆடுறாங்கள, அது போதும். அடுத்து யாரு?". குறுந்தாடி வெச்ச ஒருத்தரு வர்றாரு."ஐயா இந்தியா ஏன் 20 /20 உலக கோப்பைல தோத்துச்சுங்க?". "யாருலே நீ" . "ஐயா நான் தானுங்க இந்தியா கிரிக்கெட் டீம் மேனேஜர்". நாட்டாமை "செல்லாது செல்லாது, டீம செலக்ட் பண்ணோம, பார் இருக்குற ஹோட்டல்ல ரூம புக் பண்ணோமானு இரு, அதான் உன் பையன IPLல விளையாட விட்டோம்ல அது போதும்". அடுத்து யாரு?". பாவமா ஒருத்தரு வர்றாரு."ஐயா இந்தியா ஏன் 20 /20 உலக கோப்பைல தோத்துச்சுங்க?". "யாருலே நீ" . "ஐயா நான் தானுங்க இந்திய கிரிக்கெட் ரசிகன்". "செல்லாது செல்லாது, IPL பார்த்தோமா , cheer girlsசோடா லெக் பீஸ் பார்த்தோமா அப்புறம் நாங்க நடுச்ச விளம்பரத்த பார்த்தோமான்னு இரு, அதான் உங்க கேப்டன் IPL கப் வாங்குராருல. அதுக்கு மேல உனக்கு ஒரு வெண்கல கிண்ணம் கூட கிடையாது, போய்கிட்டே இரு".

திடீர்னு ஒரு கண்ணாடி போட்ட ஆசாமி சிரிச்சுக்கிட்டே வர்றாரு. "யாருலே நீ?". வந்தவர் "நாட்டாமை நான் தான் மாமா என்ன தெரியலையா? ". " யாருக்கு மாமா?". "நான் எல்லா கிரிக்கெட் பிளேயர்ஸ்க்கும் மாமா, IPL மாமா, மோடி". நாட்டாமை "ஐயோ மாமா நீங்களா?, இப்டி அடையாளம் தெரியாம மாறிட்டீங்களே?. டேய் மாமாக்கு சொம்புல இருக்குற தீர்த்தத்த குடுடா, மாமா எத்தன தடவ நம்மள தீர்த்தத்தாலையே குளுப்பாட்டிருக்காரு, மாமா உங்க பிராது என்ன மாமா". மோடி "இந்தியா ஏன் 20 /20 உலக கோப்பைல தோத்துச்சுங்க மாப்புள". நாட்டாமை "என்ன பண்றது மாமா கப்பு வாங்கி தர்றதுக்கு உங்கள மாதிரி அங்க ஒரு மஜா மாமா இல்லையே?".
மோடி பாக்கெட்ல கோடி, ரசிகனுக்கு தெருக்கோடி

சுறா

நாலு பைட்டு, அஞ்சு பாட்டு(அதுல ரெண்டு குத்து பாட்டு), ஒரு பெரிய வில்லன் (ஆனா அவருதான் விஜய் படத்துல காமெடியன்), லூசு ஹீரோயின். அப்போ கதை, அத கேட்ட உனக்கு கிடைக்கும் உதை. அதான் பத்து படத்துக்கு முன்னாடியே சொல்லிட்டோம்ல அதை. இன்னும் 10 தமிழ்ப்படம் வந்தாலும் இவரு திருந்த மாட்டாரு. விஜய் படம் அப்டினா தமிழ் அகராதில விளங்காத படம்னு இருக்காம். சும்மா பறந்து பறந்து அடிக்கிராருப்பா படம் பாக்குறவங்கள.
சுறா - தியேட்டர விட்டு சீக்கிரமா ஓடப்போற புறா

பிம்பிளிக்கி பிளாப்பி

போன வாரம் ரங்கநாதன் தெருவுல நடந்து போய்க்கிட்டு இருந்தேங்க. திடீர்னு ஒரு சௌண்டு. " வாங்கம்மா வாங்க, வாங்கையா வாங்க. எந்த சட்டை எடுத்தாலும் பத்து ரூவா, வெறும் பத்தே ரூவா, பிம்பிளிக்கி பிளாப்பி" அப்டின்னு சட்டைய வித்துகிட்டு இருந்தாரு ஒருத்தரு. நல்ல குடுக்குராய்ங்கய்யா டீடெய்லு. ரூம் போட்டு யோசிப்பாய்ங்களோ?. சும்மா சொல்ல கூடாது, அந்த கடைல செம கூட்டம்.
பிம்பிளிக்கி பிளாப்பி - பத்தே பத்து ரூவா

சதுரங்கம்

சதுரங்கத்த கண்டு பிடுச்சதுக்காக இந்தியா பெருமைப்படலாமுங்க. நம்மள அதுல அடுச்சுக்க ஆளு இல்லீங்க. நம்ம விஸ்வநாத் மறுபடி உலக சாம்பியன் ஆய்ருக்காரு. மற்றுமொரு பெருமை இந்தியனுக்கு. யப்பா தோனி, அவரு செய்ச்சு.....செய்ச்சு.... கப்பு வாங்கிருக்காரு.
விஸ்வநாத் - வெற்றிநாத்

ரொமான்ஸ்

கல்யாணம் ஆனதுக்கப்புறம், ஒரு ரெண்டு மூணு மாசம் கலுச்சு ரொமான்ஸ் எப்டி பண்றது?. ஒரு நாள் உங்க மனைவி எழுந்திரிக்கிறதுக்கு முன்னாடி எழுந்து சிங்க்ல இருக்குற பாத்திரத்த எல்லாம் கிளீனா வெளக்கிட்டு, வீடு முழுசும் நல்லா சுத்தமா கூட்டி விட்டு, பால எடுத்து சுண்ட காய்ச்சி ஸ்ட்ராங்கா ஒரு காபி போட்டு உங்க மனைவிய எழுப்பி "Good Morning Dear " னு காபிய நீட்டுங்க. உங்க மனைவி "என்னங்க நீங்க காபி போட்டுட்டு வந்துடீங்க" அப்டின்னு சொல்லிட்டு காபிய குடிப்பாங்க. குடுச்சதும் காபி நல்லா இருந்தா அதிகாலை முத்தம் கூட உங்களுக்கு கிடைக்கலாம், ஆனா அது நீங்க போடுற காபிய பொருத்தது. அப்புறமா அவங்க எழுந்து வந்து வீட்ட பார்த்ததும் அடுத்த அதிர்ச்சி என்னங்க வீடு கூட கூட்டிடீங்க?.சமையல் அறைக்கு போனதும் என்னாச்சு ஐயாவுக்கு பாத்திரம் கூட விளக்கிட்டீங்க?. ஒடனே நீங்க "எல்லாம் உனக்காகத்தான் இன்னிக்கு எனக்கு லீவ் தான அதான் நானே எல்லா வேலையையும் முடுச்சுட்டேன், என்ன இந்த பால் தான் பொங்கிருச்சு" அப்டின்னு சொல்லணும். ஒடனே எங்க மனைவி உங்கள இருக்கமா கட்டி பிடுச்சுகிட்டு "பரவா இல்லைங்க,தேங்ஸ்டா புருஷா, ஐ லவ் யு " அப்டின்னு சொல்லுவாங்க. அப்புறம் என்ன ஒரே ரொமான்ஸ்தான் போங்க.

இதையெல்லாம் கேட்டுட்டு கல்யாணம் பண்ணிக்கிட்டா நெறைய ரொமான்ஸ் பண்ணலாம்னு நெனச்சா அவங்கள் பார்த்து நான் பரிதாப படுறேன். ஏன்னா அதுக்கப்புறம் தாண்டி மாப்புள்ள உனக்கு இருக்கு. "ஏங்க அதான் சமைச்சுட்டு இருக்கேன்ல, சும்மா டிவி பார்த்துகிட்டு இருந்தா என்ன அர்த்தம் போங்க போய் வீட்ட கூட்டுங்க, ஏங்க கொழந்தைய பார்த்துக்குவேனா இல்ல உங்களுக்கு காபி போடுவேனா, போங்க நீங்களா காபி போட்டுக்கோங்க, ஏங்க நான் கொழந்தைய தூங்க வைக்கணும் நீங்க அந்த பாத்திரம் எல்லாத்தையும் வெளக்கிட்டு வந்துடுங்க" இந்த மாதிரி நீங்க நெறைய பார்க்கணும். இந்த ரொமான்ஸ் உனக்கு தேவையா? அப்டின்னு வடிவேலு மாதிரி உங்கள நீங்களே அடுச்சுக்க வேண்டி வரும்.

சரி மறுபடி ரொமான்ஸ முதல்ல இருந்து ஆரம்பிக்கலாம்னு அந்த மூணு வேலையும் காலைல உங்க மனைவிக்கு முன்னாடியே எழுந்து பண்ணா, அதுக்கப்புறம் தான் இருக்கு கச்சேரியே. "உங்கள யாரு இந்த வேலையெல்லாம் பண்ண சொன்னது? இப்ப பாருங்க பால இப்டி பொங்க விட்டு அடுப்பையே நாறடுச்சுட்டீங்க, ஏங்க உங்களுக்கு மண்டைல எதுவுமே கிடையாதா? உங்கள யாரு வீடு கூட்ட சொன்னது, நேத்து என்னோட கம்மல் ரெண்டையும் அந்த மூலைல கழட்டி வெச்சுருந்தேன், அதையும் சேர்த்து கூட்டீங்க, போங்க போய் குப்பை தொட்டில தேடுங்க, என்னது குப்பைய வெளில கொட்டிடீங்களா? அது எங்க சித்தப்பாவோட பொண்ணோட நாத்தனாரோட தங்கச்சியோட அண்ணியோட பொண்ணு ரெண்டு வருஷத்துக்கு முன்னாடி கன்னியாகுமரி போனப்ப வாங்கிட்டு வந்தது. ஏங்க உங்கள நான் பாத்திரம் வெளக்க சொன்னேனா? முழு சோப்பையும் கரச்சுட்டீங்க, நான் அத ஒரு வாரத்துக்கு வெச்சு தேச்சுருப்பேன். இப்டியா பாத்திரத்த கழுவுவாங்க, ஒரே சோப்பு எனக்கு எப்பவுமே ஒன்னுக்கு ரெண்டா இழுத்து விடுறதே உங்க வேலையா போச்சு. போங்க போய் உங்க வேலைய மட்டும் பாருங்க. போன்னு சொன்ன ஒடனே போய்டுவீங்களா, இந்த அடுப்ப கொஞ்சம் தொடைங்க". இப்ப சொல்லுங்க இந்த ரொமான்ஸ் உங்களுக்கு தேவையா? என்னது என்னோட ரொமான்ஸ் எப்டி இருக்கா.... அவ்வ்வ்வவ்வ்............

கள்ளக்காதல்

ராஜூ ஆர்வமாய் அந்த புத்தகத்தை படித்துக்கொண்டிருந்தான். "தம்பி அந்த ராமசாமியோட சேர்ந்து உன் தம்பி கஞ்சா கடத்தி போலீஸ்ல மாட்டிக்கிட்டான்பா, நம்ம குடும்பத்தோட கௌரவத்தையே கெடுத்துட்டான்" என்று சொன்ன தந்தையை நிமிர்ந்து பார்த்து விட்டு மறுபடியும் புத்தகத்தை தொடர்ந்தான். "உன் தங்கச்சி அந்த ரவுடி பயல தான் கட்டிக்குவேன்னு ஒத்தக்காலுல நிக்கிராப்பா, அவன் ஏற்கனவே கல்யாணம் ஆனவனாம், அவளுக்கு நீ தான் நல்ல புத்திமதி சொல்லணும்" என்ற அன்னையை சற்று எரிச்சலோடு பார்த்துவிட்டு புத்தகத்தில் மூழ்கினான். "டேய் உன் பொண்டாட்டிய அவளோட மேனேஜர்கூட சினிமா தியேட்டர்ல பார்த்தேன், அவள கண்டிக்க சொன்னதுக்கு என்கூட அன்னிக்கி சண்ட போட்டியே இப்போ என்ன செய்ய போற" என்று அக்கா சொன்னதும் புத்தகத்தை தூக்கி எரிந்து விட்டு டிவியை அணைத்துவிட்டு "இனிமேல் இந்த மாதிரி கள்ளக்காதல் சீரியல் எல்லாம் பார்க்காதீங்க"னு வெளியே கிளம்பிச்சென்றான்.

யூத்து

நம்ம மேலாளர் ஒருத்தரு ரொம்ப யூத்து. மனசுக்குள்ள இன்னும் மன்மத குஞ்சுன்னு நெனப்பு. புள்ள குட்டி போட்டு கூட இன்னும் குட்டி போட்ட பூன மாதிரி குட்டிங்க பின்னாடியே அலைஞ்சுகிட்டு இருக்காரு. காலைல எழுந்த உடனேயே மொத வேலையே சும்மா ஏரியா எல்லாத்துக்கும் யூரியா அடிக்கிற மாதிரி டை அடிக்கிறது தான். அப்புறம் நாலு தடவ குளிச்சுட்டு ரெண்டு டப்பா நாத்தா மருந்த அடுச்சுகிட்டு , காலுக்கு ரீபோக் சூ, கண்ணுக்கு ரய்பான் சன் கிளாஸ், முதுகுல ஒரு பாக் அப்புறம் கையுல ஒரு ப்ளாக்பெர்ரி போனு(பையில வெச்சா அவரு அந்த போனு வெச்சுருக்கது யாருக்கும் தெரியாதுல) எல்லாம் எடுத்துகிட்டு ஒரு 1995 மாடல் ஸ்கூட்டில ஆபீஸ்கு ஸ்டைலா(படையப்பா) வருவாரு. அந்த பாக்ல பவுடர், நாத்த மருந்து, வாட்டர் பாட்டில் அப்புறம் ஒரு கோட்டர் பாட்டில் இதெல்லாம் இருக்கும். உள்ள வரும்போதே ஒரு பொண்ணு கூட விடாம எல்லாருக்கும் ஹாய் சொல்லிட்டே வருவாரு. அன்னிக்கு எந்தெந்த புள்ள வரலன்னு சீட்டுக்கு வர்றதுக்கு முன்னாடியே தலைவரு சர்வே எடுத்துருவாரு. வந்ததும் பொண்ணுங்களுக்கு மட்டும் குட்மார்னிங் மெயில் போகும். தலைவரே இப்டி கல்யாணம் ஆகி 15 வருஷம் ஆகியும் நீங்க அடங்க மாட்டீங்களான்னு கேட்டா இல்ல தம்பி நீங்க எல்லாரும் கல்யாணம் ஆகாத bachelor பொறுக்கி பசங்க, நானு கல்யாணம் ஆகி பொறுப்பா இருக்குற குடும்பஸ்தன். அதுனால இங்கிட்டு நான் தான் ராசா, அங்கிட்டு இருக்குற எல்லா பொண்ணுங்களும் என்னோட ரோசா, நீ எடத்த காலி பண்ணு லேசா அப்டின்னு நம்ம கிட்டயே TR மாதிரி பேசுறாரு. காலைல இருந்து மத்தியானம் வரைக்கும் போடுற கடலைல ஆபீஸ் முழுசும் புகை மண்டலமா தெரியும். அப்புறம் வீட்டுக்கு போய்ட்டு சாப்டுட்டு நல்லா ஒரு குட்டி தூக்கத்த போட்டு நாலு மணிக்கு வருவாரு. வந்ததும் காபி பிரேக் போயிட்டு அஞ்சு மணிக்கு வந்தாருன மறுபடி எல்லா ப்ளோருக்கும் ஒரு ஜாலி ரௌண்டு. சரியா ஆறு மணிக்கு தலைவரு டாஸ்மாக்குக்கு கெளம்பிடுவாரு. இது தான் அவரோட ஒரு நாள் டூட்டி. இவரோட பிரதாபங்களயும் நம்ம அடுத்த பதிவுகள்ல பார்க்கலாம்.

ஐஸ்கிரீம்

இதுவும் நம்ம சித்தப்புவோட பராக்கிரமம் தான். ஒருநாளு நானு, வாய் அப்புறம் சித்தப்பா மூணு பேரும் இருந்தோம். வாய் அப்டினதும் இவன் ரொம்ப வாயாடின்னு நெனச்சுடாதீங்க, இவன் வேற மாதிரி, யார்கிட்ட எப்போ எப்டி பேசணும், எப்டி நடந்துக்கணும்னு இவனுக்கு நல்லா தெரியும், எங்க கூட்டதுலையே இவன் தான் படிப்ஸ். என்ன நாங்க ராத்திரி முழுசும் கஷ்டப்பட்டு போடுற ப்ரோக்ராம்ஸ் எல்லாத்தையும் பொண்ணுங்க கிட்ட சூர விட்ருவான். சரி விஷயத்துக்கு வருவோம். அன்னிக்கு ரொம்ப வெக்கையா இருக்குதேனு மூணு பேரும் ரோட்ல நடந்துகிட்டு இருந்தோம். அப்போ அந்த பக்கமா ஒரு ஐஸ் வண்டி வந்துச்சு. ஒடனே சித்தப்பா ஐஸ் கிரீம் வாங்கி குடுத்தாலே ஆச்சுனு அடம்பிடுச்சான். நாங்களும் சரி வயசான காலத்துல ஆசப்பட்டத சாப்டட்டுமேனு அரை லிட்டர் ஐஸ்கிரீம் வாங்கிட்டு வந்தோம். வரும்போது ஒரு பாம்ப பார்த்தோம். ரூம்ல வெச்சு சாப்டும்போது சித்தப்பா அவனோட வாழ்க்கைல நடந்த பாம்பு கதைகள எட்டாவது தடவையா சொல்ல ஆரம்பிச்சான், ஆனா இங்கிட்டு நானும் வாயும் ஐஸ்கிரீம காலி பண்ணிட்டோம். கதைய முடுச்சுட்டு கீழ பார்த்த சித்தப்பு அப்டியே ஷாக் ஆய்ட்டான். எங்கடா ஐஸ் கிரீம்னு கேட்டான். அதுக்கு நானு மாப்புள நீ மொக்கை போடுறப்ப அந்த வெக்கை தாங்க முடியாம நாங்க காலி பண்ணிடோம்டானு சொன்னேன். ஒடனே சித்தப்பு "மொக்கைனா என்னடானு" கேட்டான் அதுக்கு நானு நீ போடுற எல்லாமே மொக்கை மட்டும் தாண்டான்னு சொல்ல என்னைய கொலைவெறியோட பார்த்தான். ஒடனே சரி விடுடா முடுஞ்சது முடுஞ்சு போச்சுன்னு நான் சொல்ல சித்தப்பு "அப்போ முடியாதது முக்கிட்டு போச்சா?", எனக்கு ஒடனே ஐஸ்கிரீம் வேணும்னு கேட்டான். அதுக்கு வாய் சொன்னான் " இல்லடா முடுஞ்சது வாய்குள்ள போய்டுச்சு, முடியாதது காலைல போகும்"னு. ஆணியே புடுங்க வேண்டாம்னு சித்தப்பு போத்திக்கிட்டு படுத்துருச்சு. வெளக்கெண்ணைய பூசிகிட்டு உருண்டாலும் ஒட்டுறது தான ஒட்டும், நாஞ்சொல்றது சரிதான?

தோழி

மக்களே இது என்னோட சொந்த கற்பனை(ரூம் போட்டு யோசிச்சது), இது இந்தியாவிலோ, தமிழ்நாட்டிலோ இல்லை மதுரையிலோ இருக்கும் யாரை பற்றியும் எழுதவில்லை என்பதை அண்ணன் அஞ்சா...... சார்பாக கூறிக்கொள்ள கடமைப்பட்டுள்ளேன். படுச்சுட்டு என்சாய் பண்ணுங்க.

தோழி


என்னை விட்டுச்சென்ற தோழி என் மனதில் விதைத்துச் சென்றது அவள் நினைவுகளை. விதை வளர்ந்து விருட்சமாய் இருபது அவளுக்கு தெரியாதே. அதை மறைக்க முடிந்த என்னால் ஏன் அவளை மறக்க முடியவில்லை. எப்பொழுதெல்லாம் அவளது நியாபகம் வருகிறது? எப்போது வராமல் இருக்கிறது. மறந்தால் தானே அவளை நினைப்பதற்க்கு. எட்டுத்திக்கிலும் எங்கு நோக்கினாலும் எப்படிச்சென்றாலும் உன் நினைவுகளே. உனக்கு விருப்பமான பாடல்களை பார்த்தால், சிறுகுழந்தை கன்னத்தைக் காட்டி முத்தம் கேட்டால், பொரிகடலை மாவு உருண்டையை பார்த்தால், யாரவது பலூன் கேட்டால், பஞ்சுமிட்டாய் கலரை பார்த்தால், எங்காவது 35 என்ற எண் கண்ணில் பட்டால், strawberry ஐஸ்கிரீம் ருசித்தால், நீண்ட கூந்தல் கண்டால், நெற்றியில் குங்கும கீற்றோடு எதிரே ஒரு பெண் வந்தால், மாமா என்று யாரவது என்னை அழைத்தால், திருப்பதி லட்டு யாரவது கொடுத்தால், கன்னகுழியோடு என்னருகே ஒரு பெண்மை வந்தால்,செல்லம் என்ற வார்த்தை என காதில் கேட்டால் உடனே ஓங்கி வளர்கிறது உன் நினைவு என்னும் விருட்சம். இவை அனைத்தும் அனுதினமும் ஒருமுறையேனும் நடந்து விடுவது ஏனோ?. அன்று தூக்கத்தை மறந்து அலைபேசினேன் உன்னோடு, இன்றோ தூக்கத்தை தொலைத்து அசைபோடுகிறேன் உன் நினைவோடு. என்றேனும் உன்னை காண்பேன் என்ற நம்பிக்கையோடு காத்திருக்கும் - தோழன்.

யாராச்சும் கண்டு பிடுச்சா சொல்லுங்கப்பா:-)

சிம்புவின் சொல்ல மறந்த கதை

சிம்புன்னு சொன்னதும் நீங்க எதோ விண்ணை தாண்டி வருவாயா சொம்புன்னு நெனச்சுடாதீங்க. இவன் தொட்டி ஜெயா சிம்பு. ரொம்ப மோசமான பையன், ஒரு காதல் பறவையோட(love bird) கர்பத்தையே கலச்சவன், அந்த கதைய இன்னொருநா சொல்றேன். சித்தப்பா ஒரு முக்கா டௌசர் வெச்சுருந்தான், அது இந்த சூட்கேஸ் ஒற துணில செஞ்சது. அவன் சின்ன புள்ளையா(?) இருக்குறப்போ வாங்குனது. பத்தாம போன பாண்ட ஸ்டைலா முக்கா டௌசரா போட்டுக்கிட்டு அலைஞ்சது இந்த பக்கி. இதுல என்ன விசேஷம்னா அத வருஷத்துல ஒரே ஒரு தடவ தான் தொவைக்கும். கேட்டா வைகை ஆத்துல எப்போ தண்ணி வருமோ அப்போ தான் இவுரு தொவப்பாராம். பாசக்கார பய மக்களே இதெல்லாம் நடக்குற விசயமா?. இந்த அளவுக்கு பெருமை வாய்ந்த அந்த டௌசர எங்க ரூம் வாசல்ல தொங்க விட்ருவோம். ஏன்னா ஒரு கொசுகூட ரூம்குள்ள வராதுன்னா பாத்துகோங்க. எல்லாமே வாசல்லையே செத்துபோய்டும். அப்டி ஒரு சக்தி வாய்ந்தது. ஒரு நாளு டௌசர் வெளில தொங்குற தைரியத்துல எல்லாரும் ரூம்குள்ள உட்கார்ந்து படுச்சுக்கிட்டு(ஹிஹிஹி ) இருந்தோம். சிம்பு மட்டும் எதோ தீவிரமா ஆராய்ச்சி பண்ணிக்கிட்டு இருந்தான். கொஞ்ச நேரங்கலுச்சு சித்தப்பாவ சொரண்டி, அங்க பார்ரா அதிசியத்தனு சொன்னான். ஒரு ரெண்டு இன்ச் கேப்ல ஒரு கருந்தேள் வந்துக்கிட்டு இருந்துச்சு. எல்லாரும் அடுச்சுப் பிடுச்சு எந்திரிச்சு ஓடுனோம். சித்தப்பா ஜஸ்ட் எஸ்கேப்பு. நம்ம பைல்வான் அந்த தேள நசுக்குனாறு. சித்தப்பா நன்றியோட சிம்புவ பார்த்து "ரொம்ப தேங்ஸ்டா மாப்பி, எதோ அதிசயம்னு சொன்னேல அது என்னடா"ன்னு கேட்டான். அதுக்கு சிம்பு சொன்னத கேட்டு சித்தப்பா கொலவெறியோட தொரத்துனான். என்ன சொன்னான்னா " அது வேற ஒன்னும் இல்லைடா மாப்பி, அந்த தேளு வாசலுக்கு வரும்போதே பாத்துட்டேன், உன் டௌசர தாண்டி உயிரோட வந்துச்சா அதான் மெய் மறந்து சொல்ல மறந்துட்டேன்".

தோழன்

"உடுக்கை இழந்தவன் கைபோலே ஆங்கே
இடுக்கண் களைவதாம் நட்பு "

இது வள்ளுவர் சொன்னது. நான் கொண்டிருத்த அந்த நட்பு வெகு சமீபத்தில் என்னை தனியே விட்டுச் சென்றது. ஒன்றல்ல இரண்டல்ல 17 வருடங்கள் ஒன்றாக இருந்தோம். என்னை அறியாமல் நீ எதையும் செய்ததில்லை, உனக்கு சொல்லாமல் நான் எதையும் செய்ததில்லை. இரட்டையர்கள் வருகிறார்கள் என்று ஊரே மெச்சியது. கடவுள் என்ற வார்த்தையை என் வாழ்வில் அகற்றிய நான் கோவிலுக்கு வந்தது உன்னை பார்க்க மட்டுமே. நீ இல்லை என்பதையே என் இதயம் ஏற்க மறுக்கிறது.மற்றவருக்கோ நீ ஒரு மனிதன் எனக்கு நீ என்பது நானே. இதோ இப்பொழுதும் என் தந்தை எதாவது கேட்டல் அவனிடம் கேளுங்கள் என்ற வார்த்தையே என்னுள் எழுகிறது. நீ இல்லாத இக்கணங்களில் திக்கு தெரியாமல் அலைகிறேன், தனிமரமாய் தவிக்கிறேன். நடந்தவைகளை சொல்ல மனம் இல்லை. என்னை பொறுத்தவரை என்னுள் இருக்கும் நீ என்னுடன் இல்லை. மிஸ் யு டா.

என்றென்றும் உன் நினைவுகளோடு

உன் நண்பன்

கிண்டர் கார்டன்

கிண்டர் கார்டன் அப்டினதும் நான் எதோ பால்வாடி பத்தி பேச போறேன்னு முடுவு பண்ணிடாதீங்க மக்களே. சில கொழந்தைங்க MCA படிக்கிறப்போ ரூம் போட்டு படுச்சா தான் நல்லா படிக்க முடியும்னு ரூம் போடாமலே முடிவு பண்ணி ரூம் போட்டாங்க (படிக்கிறதுக்குங்க). இதுல என்ன தொழில் ரகசியம்னா எல்லா பக்கிகளும் உள்ளூருதான். ஒரே ஒரு பக்கி மட்டும் பழனி. நாங்கெல்லாம் மருதைங்க(மதுரை) . அந்த மாதிரி கொழந்தைங்க(?) தங்கி இருந்த ரூம "கிண்டர் கார்டன்" அப்டினு கூப்டனும்னு எல்லாருக்கும் டீ வாங்கி குடுத்து கரெக்ட் பண்ணிடாய்ங்க. மொத்தம் ஆறு கொழந்தைங்க தங்கி இருந்துச்சுங்க. அதுல இந்த கொழந்தையும் ஒன்னு(ஹி ஹி ஹி அமுல் பேபி). கொழந்தைகள பத்தி பாக்கலாம்

அமுல் பேபி - எங்க பாமிலியே அமுல் பேபி பாமிலி தான், ஏன்னா நாங்க எல்லாருமே எப்பவுமே குண்டா தான் இருப்போம். நான் இதுல ரொம்ப முக்கியமான ஆளு இல்லீங்க.

சித்தப்பா - இது தாங்க இந்த தொடருல ஹீரோ. ஆளு இவன் குள்ளம் தான் ஆனாலும் பண்றதெல்லாம் கோக்குமாக்குதான். வாய் மட்டும் செக்கானூரணி வரைக்கும் போகும். ரூம்ல யாருக்கு கோவம் வந்தாலும் குமால்டிகா இருந்தாலும் இவன போட்டு நாலு சாத்து சாத்துவோம். மனசுக்கு அவ்ளோ திருப்தி வரும்னா அது எவ்ளோ சேட்டை பண்ணும்னு தெருஞ்சுக்கோங்க. அப்புறம் இது ஏன் சித்தப்பானா? இது எங்க தாத்தா செட்டு, பெயில் ஆகி எங்க கூட படுச்சுக்கிட்டு இருந்துச்சு. பாக்குறதுக்கு வையாபுரி குள்ளமா இருந்தா எப்டி இருப்பாரோ அப்டி இருப்பான்.

வெள்ளையன் - பழனில ஊர்மக்கள் எல்லாரும் ஊர் நல்லா இருக்கணும்னு இவன ஊற விட்டே தொரத்திட்டாய்ங்க. எங்க கெரகம் இது எங்க கூட வந்து செட்டில் ஆய்டுச்சு. வெள்ளையா இருக்குற ஒரே காரணத்துக்காக மாசத்துல ஒரு நாள் மாட்டும் தான் குளிப்பான். விடிய விடிய examku படுச்சுட்டு விடிஞ்சதும் தூங்கி examku போகாம அரியர் வெச்ச பக்கி. உலக மகா சோம்பேறி.

அனுமாரு - நெசமாலும் இவரு அனுமாரு தான். நாங்களாச்சும் எங்க காலேஜ்ல பொண்ணுங்க கூட கடலை போட்ருக்கோம்(அத மட்டும் தானடா பண்ணீங்கனு சொல்றது கேக்குது...... அதையெல்லாம் சொன்னா நல்லா இருக்காதுல.... வரலாறு முக்கியம் அமைச்சரே). ஆனா இவன் யார்கூடயும் பேசமாட்டான்(பொண்ணுங்க கூட தான்). எனக்கும் இவனுக்கும் ஒரே வேலை அந்த சித்தப்பாவோட மாரடிக்கிரதுதான். சில சமயம் மாத்து குடுக்குறதும்தான்.

சிம்பு - நெஜமாலுமே இவன் சிம்புவோட ரசிகன். பாக்குறதுக்கும் அப்டிதான் இருப்பான். பாதிநாள் வீட்டுக்கு ஓடிருவான். இவன் தான் எங்க ரூம் பாய். அதாங்க ரூம கூட்டி, ஒதுங்க வெச்சு சுத்தமா வச்சுகிறது. ஊமைக்குசும்பன்.

வாய் - வாய் மட்டும் தான். எங்க உனிவேர்சிட்டிலையே ரொம்ப நல்ல பையன் ஆருன்னு கேட்டா எல்லா பொண்ணுங்களும் இவன தான் சொல்லுவாளுங்க, உண்மைலையே... மத்த நாங்க எல்லாருமே bad பாய்ஸ். பொண்ணுங்களுக்கு ஒரு பிரச்சனைனா முதல் ஆளா அங்க இவன் தான் இருப்பான்.

பைல்வான்- ஆளு சும்மா அம்ஜத்கான் மாதிரி இருப்பான். பேச்சே கிடையாது ஒன்லி வீச்சு தான்( அவன் கையால தாங்க). இவன்கிட்ட டெய்லி யாராச்சும் அடி வாங்காம இருந்ததே இல்ல. நாங்க எல்லாம் இவன ஓட்டுவோம் இவனால பதிலுக்கு எதுவும் சொல்ல முடியாது. ஒரே போடா போட்ருவான். இவனும் வாயும் ஒன்னாவே திரிவானுங்க.


இது தாங்க நம்ம கிண்டர் கார்டன். இவனுங்க அடுச்ச லூட்டி, லந்துகள நாம வரும் பதிவுகள்ல பாக்கலாம்.சனியன் சடை பின்ன ஆரம்பிச்சுடுச்சு, இனி போட்டு வெச்சு பூ வைக்காம போவாது. அவ்வ்வ்வ்.......

கெளம்பிட்டாய்ங்கய்யா..........

அங்காடி தெரு

பெருசு பெருசா இருக்குற கடைங்கள்ல நடக்குற வெவகாரத்த நல்லா சொல்லிப்புட்டு கிளைமாக்ஸ்ல சொதப்பிட்டாருப்பா வசந்த பாலன். ரொம்ப நாள்களுச்சு ஒரு நல்ல படம் பார்த்த திருப்தி. ஈரக்கொலைல என்னமோ பண்ணுச்சு, மனசு ரொம்ப கனமாய்டுச்சு. அங்கிட்டு நடக்குற கொடுமைய சொன்ன மாதிரி அதுக்கு ஒரு தீர்வு சொல்லிருந்தா இன்னும் நல்லா இருந்துருக்கும்.

அங்காடி தெரு - உண்மை சுடும்

குட்டிப்பிசாசு

தமிழ்நாட்டுல மிகப்பெரிய ஜால்ரா யாருன்னு கேட்ட சின்ன குழந்தையும் சொல்லும் வாலி தானு. ஆனா அவரையும் மிஞ்சிட்டானுங்கப்பா குட்டிப்பிசாசு இசைவெளியீடு விழால. அள்ளிவிடுரானுங்க... முடியல. ராமநாராயண், இவரோட முழுநேர தொழில் கலைஞர துதி பாடுறது. அப்பப்போ எதாச்சும் படத்த சுட்டு இவரு படம் ரிலீஸ் பண்ணுவாரு. இவரு கலைஞருக்கு விளம்பரம் பண்ணுவாரு கலைஞர் டிவி இவர் படத்துக்கு விளம்பரம் பண்ணும். கிவ் அண்ட் டேக் பாலிசி. கூடிய சீக்கிரம் தமிழ்நாடு வல்லரசு ஆய்டும் ஆய்டும் ஆய்டும். கொடுமையோட உச்சகட்டம் அந்த படத்தோட விஷுவல் எபக்ட் பண்ணவரு சொன்னதுதான் " அவதாருக்கு ஒம்போது வருஷம் கஷ்டப்பட்டு பண்ணத இவரு இந்த படத்துக்காக ஒம்போது மாசத்துல பண்ணிட்டாராம் அதே தரத்துல". 4 ஹாலிவுட் படத்துல இருக்குற சீன காப்பி அடுச்சுட்டு இவிங்க விடுற சீனுக்கு அளவே இல்லப்பா. பவர் ரேஞ்செர்ல கூட இத விட நல்லா கிராபிக்ஸ் பண்றாங்கப்பா. இத தட்டிகேட்க ஒரு அகில உலக சூப்பர் ஸ்டார் வரமலா போய்டுவாரு.

IPL

நல்லா காட்டுனாய்ங்கப்பா பிலிமு. ஒருத்தரு மூணு ஓவர்ல மாட்ச செயிச்சு குடுப்பாராம் ஆனா அவர மூணு ஓவருக்கு முன்னாடிதான் அனுப்புவாங்களாம். அப்டி அவரு அடிக்கலனா அந்த வெற்றியே தேவை இல்லையாம். எல்லாம் பணம். தோனி மண்டைல நெறைய கணம்.

IPL - காதுல பூ, கைல சட்டி, வாய்ல அல்வா.


ஹவுஸ்புல் - ஹிந்தி படம்

நம்ம 'காதலா காதலா' படத்தோட ஹிந்தி version, akshai kumar மட்டும் கலக்கி இருக்காருப்பா. அந்த இன்னொசென்ஸ் அவரோட மூஞ்சில அப்டி தெரிது. வழக்கம் போல 3 ஹீரோ நெறய பொண்ணுங்க. எல்லாரும் முடிஞ்சா அளவுக்கு பிகினில மட்டும் தான் வர்றாங்க. தமிழுல இருந்த பெப்பு ஹிந்தில இல்ல. அந்த ஹோமோசெக்ஸ் காமெடி,அந்த நீக்ரோ கொழந்த காமெடி மட்டும்தான் படத்துல comedy மத்ததெல்லாம் நமக்கு tragedy

ஹவுஸ்புல் - ஹவுஸ்புல்லா actors ஆனா noacting

அண்ணாவும் வாஷ்பேசினும்

இப்போ இருக்குற பயபுள்ளைங்க ரொம்ப வெவரமாதான் இருக்காய்ங்க, இப்படித்தான் எங்க அக்காமகன் ஒருத்தன் இருக்கான். கொஞ்சம் கோக்குமாக்கான ஆளு. ஒருநாளு பொவேன்டோ குடுச்சுகிட்டு இருந்தான். மதுரைக்குன்னு நெறைய பெஷல் இருக்குங்க. அதுல ஒண்ணுதான் இந்த பொவேன்டோ. மத்தத பத்தி இன்னொருநாள் பாக்கலாம். இருக்குறது ஒரு பாட்டில் தான். அதுனால எங்க அம்மா சொன்னங்க "தம்பி நீ குடுச்சுட்டு அண்ணாக்கு குடுடானு". நம்ம பயதான் யமகாதகனாச்சே அவன் சொன்னான் " வாய் வைக்காம அண்ணாகதான குடிக்கிறேன் அப்புறம் ஏன் மறுபடி அண்ணாக குடிக்க சொல்ற".


இன்னொரு நாளு இந்த பயல கூட்டிட்டு எல்லாரும் துணி எடுக்க எ.கே. அஹ்மத் போயிருக்காவ. அங்கன போனதும் இவன் டவுசர புடுச்சுட்டு "அம்மா ஒண்ணுக்கு வருதுன்னு" சொல்லிருக்கான். அவுங்களும் அங்கன இருக்குற பாத்ரூம்க்கு கூட்டிட்டு போயிருக்காங்க பயலும் போய்ட்டு வந்துட்டான். வீட்டுக்கு வந்ததும் கிரைண்டர் மேல ஏறி நின்னு வாஷ்பேசின் மேல ஒண்ணுக்கு இருந்துருக்கான். எங்க அக்கா ரெண்டு அடிய போட்டு ஏன்டா இப்டி பண்ணணு கேட்டா, துணிக்கடைல அப்டித்தான் இருந்தேன்னு சொல்லி இருக்கான். பயபுள்ள கடைல urine basin அடுச்சுட்டு வீட்ல வந்து வாஷ்பேசின்ல அடுச்சுருக்கு

ஒரு சூறாவளி கிளம்பியதே

நமக்கு கொல்லநாள் ஆசைங்க ஒரு ப்ளாக் ஆரம்பிக்கணும்னு, ரெண்டு மூணு மாசமா நெனச்சுகிட்டே இருந்தேன் , எப்டியோ இன்னிக்கு ஆரம்பிச்சாச்சு. நானு கேபிள் சங்கரு(யதார்த்தம்) , நர்சிம்(இலக்கியம்), சேரல்(கவிதை), கார்க்கி(மொக்கை), சாரு(விதாண்டவாதம்), அக்கரைச்சீமை(விமர்சனம்), தண்டோரா, பரிசல்காரன் அப்புறம் நிலாரசிகன் இவங்களோட விசிறி. எல்லாரும் அப்பப்போ நம்ம ப்ளாக்குக்கு வந்து ஆதரவு தருமாறு அண்ணன் அஞ்சா.........(நாங்கெல்லாம் மதுரைக்காரைங்கல) சார்பாக கேட்டுகொள்கிறேன். ஆட்டோ வந்துச்சுனா இந்த தம்பி பொறுப்பு இல்ல. அப்புறம் எல்லாரும் சித்திரை திருவிழாக்கு வாங்க. என்னோட முதல் படைப்போடு மறுபடி சந்திக்கிறேன்.

நன்றி